السبت، مارس ١١، ٢٠٠٦

فى حب مصر

هاينفع ؟!!؟ اكيد هاينفع

هانبات ؟!!؟ اكيد هانبات

فى الشارع ؟!!؟ طبعاً فى الشارع

طب اليوم بتاع مين ؟!!؟ بتاعنا احنا كلنا

يوم كل الناس اللى بتحلم بالناس والشارع ... يوم الحبة اللى فوق والسبعين مليون حبة اللى تحت ... اليوم دا مش بتاع دول ... ولا بتاع دول ... مش بتاع حد ... دا يوم لينا كلنا .. يوم بتاعنا احنا .. يوم كله الوان وأعلام ... مهرجان كبير ... نغنى نرقص .. نطبل نزمر .. نقوم نقعد .. ننام نصحى .. نعمل كل اللى احنا عاوزينه .. ها ننط لفوق فى الهواء ... يمكن نطول القمر .. يمكن نقدر نبقى عصافير ... يمكن نطير ... ها نقرب وشوشنا نشم النجيل .. نشم الأرض .. يمكن نلاقى الربيع .. يمكن نلاقى اللى تايه ..يمكن نلاقى اللى فايت ... ها نفرش نفسنا على الارض ... نلزق نفسنا اكثر فى امنا الكبيرة الأرض ... يمكن الربيع المرة دى يفتح أزهاره فوقنا ... يمكن شجرنا يطرح ... ها نشم هواء تانى .. هواء يدخل من الأنوف .. للرئات .. للعقول .. ينعش .. يلطف .. يجدد ... نحاول نقرب من بعض .. نِفهم بعض .. او نفَّهِم بعض لبعض .. يمكن نقدر نكون واحد .. يمكن نلحق بعض .. هانعمل دايرة كبيرة ... تكبر وتكبر وتعمل بيت كبير ... بيت كبير يسعنا كلنا ..هانرفع علم كبير فى وسط الميدان .. هانعلن الميدان حر لمدة يوم واحد .. ميدان حر من كل الأشباح المخيفة ... هانبقى احرار ولو لمرة واحدة .. مرة واحدة يمكن نبقى احرار على طول

كتبها ايــــــــــــــــــوب :: ٩:٤٤ م :: 4 نيران صديقة :

ها ياسيدى .. قول رأيك

------------------o0o------------------