السبت، أكتوبر ١٥، ٢٠٠٥

سينيما العمر

هذه اليلة , هى الأخيرة فى عامى الثلاثين , وشمس الغد هى الأولى فى عقدى الرابع , ما يسيطر على الان- وربما منذ مدة - هو الأحساس بمنتصف العمر , أرى الاشياء بمنطق مختلف وبرؤية مختلفة ايضا , ماذا يمكن أن نسمى هذا الشعور؟؟؟

لا أدرى

لكنى أتخيل نفسى فيما انقضى من عمرى - كما تصورالسينيما الأمريكية - كمغامر يركب قارب صغير ليستكشف مسار نهر مجهول فى أرض جديدة , وهو لا يعلم أنه ينجرف الى شلال هائل وأن نهاية النهر هى نهايته إلا بعد فوات الاوان , وانا الأن - برغم نهرى الهادىء وزورقى المستقر- أشعر بالإنجراف نحو الشلال لكننى لا أبالى وكأننى أتلذذ بهذا الإنجراف , وأرانى قد استلقيت على ظهرى مشدوها الى السماء متلذذاً الإنجراف غير عابىء بالزورق أو بالنهر أو بالشلال

بعدت ولادتى فى الزمن ثلاثين سنة
صبحت تاريخ زى السيوف والسقايين
زى الشراكسه والشموع والسلطنه
زى الخيول ... ضاعت سنينى فى السنين

=======================

اكتوبر 1975 .... بداية المشوار

أبى يستقبل المهنئين لمولوده الأول

موسيقى الخلفية .. رق الحبيب غناء أم كلثوم وكلمات شاعر الشباب أحمد رامى

انا : وآآآآآآآآآء ..... وآآآآآآآآآآآآآآآآآآآآآآآء....... وآآآآآآآآآآآآآآآآء
أحدهم: ألف ألف مبروك , ولد زى الفل , ها تسميه إيه ؟؟؟ على إسم جده ولا على إسم عمه ؟؟؟؟؟
بابا : لآ لآ ... لا جده ولا عمه , دا هايبقى حاجه تانيه خالص , أنا هاسميه... رامى
أحدهم (مندهشا ) : اشمعنى رامى !!؟؟؟
بابا : أيوا رامى على إسم الشاعر أحمد رامى , لازم أربيه بشكل مختلف يحس بالجمال والفن , يعرف الحق والخير .... لازم الولد يكون رامى

===================

خريف 1981 .... زَ رَ عَ , حَ صَ دَ

موسيقى الخلفية .. أبجد هوز ليلى مراد

بابا : رامى
رامى : نعم يا بابا
بابا : أخبار المدرسة إيه النهارده ؟؟؟؟؟

رامى : الحمد لله يا بابا .. النهارده أخذنا درس جديد فى الحساب .. درس الجمع
بابا : وفهمت الدرس كويس ؟؟؟
رامى : طبعاً طبعاً , وجاوبت على كل الأسئلة وحليت الواجب كمان
بابا : برافو عليك , قولى بقى عرفت ايه عن الجمع ؟؟؟؟
رامى : إحمم .. حمم , بطة زائد بطة تساوى بطتين , وتفاحة زائد تفاحة تساوى تفاحتين .. صح كدا يا بابا ؟؟
بابا : صح يا حبيبى ... طب قولى برتقانة وبرتقانة يبقوا كام ؟
رامى : برتقانة و برتقانة ؟؟ يبقواااا ... آآه يبقوا برتقانتين ... صح؟؟
بابا : برافو إنت شطور قوى .... طيب إسمع برتقانة وتفاحة يبقوا كام؟
رامى : ها ..؟؟ يبقوا بررتقــــ .... لآ لآ يبقوا ..تفـاااا ... لآلآلآ
بابا : هاهاها ... مايبقوش حاجة ياسى رامى , برتقانة و تفاحة هما برتقانة و تفاحة ... مش كل الحاجات يابنى ينفع تتجمع

==================

صيف 1992.... النيل نجاشى - أول مرة

أحمد و رامى على شاطىء النيل

موسيقى الخلفية .. محمد منير بنتولد

رامى : الله .... جميلة أوى القصيدة دى يا أبو حميد
أحمد : عجبتك صحيح ؟؟؟؟
رامى : جداً .... والجميل إنك بتكتب عن مشاعر الحب زى الشعراء الكبار , بيتهيألى إنك متأثر شويه بنزار ؟؟؟؟
أحمد : زى ما انت متأثر بتوفيق الحكيم ؟؟؟
رامى : انت قرأت المسرحية ؟؟؟
أحمد : خلصتها النهارده
رامى : وإيه رأيك ؟؟؟
أحمد : جميلة والفكرة كمان جديدة , بس المعنى اللى فيها خطير
رامى : أى معنى ؟؟؟؟
أحمد : تأكيدك على ضرورة التمرد على القوة اللى بتتحكم فينا واللى رمزت لها بأنها سلطه جبارة وقادرة وخفية , دا غير النهاية

المفتوحة الغامضة كل دا بيلمس خطوط حمراء ممكن, جبارة وقادرة وخفية تتفسر غلط

رامى : تتفسر غلط ؟!!!؟
أحمد : ايوا يا رامى .. الواضح انك بتطرح محاولة التمرد على الذات الإلهية
رامى : هاهاها .... مش للدرجة دى , انا ما قصدتش دا خالص , لكن عموما مادام المسرحية خلتك تفكر فيها على أى ناحية يبقى انا

نجحت

======================

صيف 1993 .... النيل نجاشى ... تانى مرة

موسيقى الخلفية .. محمد منير شبابيك

رامى : مافيش أخبار عن النتيجة
أحمد : اسكت والنبى ماتفكرنيش
رامى : يابنى انت مش حليت كويس ؟؟
أحمد : ايوا بس بابا عاملها موقعة حربية
رامى : عادى يا سيدى كلهم كدا , المهم قولى .. نفسك تخش كلية ايه؟؟؟
أحمد : انا نفسى ادرس صحافة وإعلام

رامى : طب ودخلت علمى ليه بقى ؟؟؟
أحمد : بابا ياسيدى عاوزنى اخش طب , وانت يارامى نفسك فى اى كلية ؟؟
رامى : انا كمان بابا عاوز يدخانى الطب بس انا نفسى ادرس سينيما أو فنون جميلة

========================

خريف 1997 .... النيل ماجاشى

موسيقى الخلفية .. محمد منير لو بطلنا نحلم نموت

أحمد : مالك ياعم انت ؟؟؟
رامى : ماليش
أحمد : يابنى فكك بقى انت مش اول واحد حبيبته تسيبه وتتخطب لواحد تانى
رامى : والنبى يا أحمد سيبنى فى حالى
أحمد : انا قلت لك من الاول ان انت اللى غلطان , انتوا فى سن واحد وهى جميلة ومؤدبة وبنت ناس , والطبيعى انها تتخطب دلوقتى خصوصاً ان العريس جاهز من كله , وانت لامؤاخذه يعنى لسه مشوارك طويل
رامى : طويل فين ؟؟ دى كلها سنة اخلص بكالوريوس التجارة
أحمد : المسألة مش مسألة بكالوريوس , لسه الجيش والشغل ولازم تكون نفسك على الاقل خمس سنين كمان , وبعدين احمد ربنا امال انا اعمل ايه فى السبع سنوات العجاف بتوع الطب ثلاثة فاتوا ولسه اربعة زى البكالوريوس بتاعك
رامى : على أى الأحوال هى اختارت وانا كمان لازم اختار
أحمد : مش فاهم !!؟
رامى : الفلوس هى الحل , انا لازم اشتغل وأعمل فلوس
أحمد : وهاتشتغل ايه يافالح ؟؟؟
رامى: البلد فيها مشاريع ومستثمرين والدنيا مفتوحه على البحرى هاعمل أى حاجه بس لازم أوصل وأحقق ذاتى باسرع وقت .. فاهم يا احمد .. لازم

======================

اكتوبر 2001 ....على القهوة

موسيقى الخلفية ..محمد منير انا قلبى مساكن شعبية

أحمد : سلام عليكم
رامى : أهلآآااًن ... عم أحمد الطبيب الشاعر .. حمد لله على السلامة
أحمد : الله يسلمك واحشنى يا وغد
رامى : ماتشوفش وحش .... ايه يابنى كلى دى غيبة ؟؟؟
أحمد : ماهو دا اللى أخذناه من الطب , الواحد ماصدق انه يخلص يقوموا يبعتوه ورا الشمس تكليف ثلاث سنين , زى ما يكونوا بيعاقبونى
رامى : ما تكبرش الموضوع يا دكتور , دا تكليف الأطباء كلهم بينفذوه
أحمد : مش بالشكل دا يأخى انا بقى عندى 26 سنة ومش عارف رأسى من رجلى وما عملتش أى حاجه فى اى حاجه ,لا فلوس ولا جواز ولا أى حاجه وكل الأحلام بقت مؤجلة
رامى : بالراحه على نفسك يا دكتور .. تشرب حاجه
أحمد : ولا أى حاجه ماليش نفس
رامى : لأ إزاى بقى ... يااايحيّى .. يااا يحيّى هات لامونادا للدكتور
أحمد : معلش انا دوشتك معايا ونسيت اسألك لقيت شغل ولا لسه؟؟؟؟
رامى : هاهاهاها .... لأ لسه
أحمد : طب وبعدين ؟؟
رامى : ولا قبلين ... تلعب طاولة ؟؟؟
أحمد : العب طاولة
رامى : يااااايحيّى ... هات طاولة معاك

=====================

صيف 2004 .... يااااااعلى

ميكروباص متهالك يحمل اجسادا مكدوده من نهاية عمل فى يوم حار , رامى يجلس فى المقعد الخلفى حاملا كتب قديمة رفعها لتوه من على أحد الأرصفة , على يسارة شخص بلا ملامح استسلم لنوم عميق وعلى يمينه شاب صغير يتلصص بعينيه على كتب رامى , يتردد من الكاسيت صوت أحمد حلمى وريكو وهما يصيحان كلاعبى السيرك : يااااااعلى

الموسيقى - ليست فى الخلفية - ولكن فى الميكروباص

رامى ( بعصبية ) : ممكن يا أسطى توطى الكاسيت ؟؟؟

( السائق يفعل بلا مبالاة )
الشاب : لو سمحت ممكن أشوف الكتاب اللى معاك ؟؟؟
رامى (حانقا ) : اتفضل
الشاب : شكراً , هو حضرتك بتقرأ من زمان
رامى ( ساخرا ) : هاهاها ... انت عندك كام سنة ؟؟
الشاب : 17
رامى : اهو انا كمان بقرأ من 17 سنة
الشاب : دا انت قرأت حجات كتير أوى
رامى : مم يعنى, قولى انت بتحب تقرأ ؟؟؟
الشاب : أوى
رامى : جميل .. بتدرس ؟؟
الشاب : ها أدخل الجامعة إن شاء الله
رامى : كلية إيه ؟؟؟
الشاب ( فى حيرة ) : لسه مش عارف .. انا لسه جاى من مكتب التنسيق والورق معايا أهو
رامى : فى خيارات قدامك ؟؟؟
الشاب ( فى لا مبالاة ) : ممم تجارة , حقوق , أدآب , ويصراحه انا محتار ممكن تقولى رأيك ؟
رامى ( مرتبكا ) : إحمم ..حمم .. مش عارف بصراحه , كلهم كويسين , انت نفسك تخش ايه ؟؟؟
الشاب ( فى بلاهه ) : انا مش فارقه معايا
رامى ( غاضبا ) : عاوز رأيى خش أى حاجه مش هاتفرق , والأحسن ماتخشش أى حاجه
الشاب : ها .. ما أخشش .. إزاى ؟؟؟؟

ريكو ( يشدو ) : راحت عليكى يا دنيا .. وراح زمن الشهدات
رامى ( صائحا ) : انت حر , ما توجعليش دماغى , على الكاسيت يا أسطى , ولا أقولك نزلنى هنا

=====================

أمس 14 أكتوبر2005....منتصف العمر

موسيقى الخلفية .. محمد منير - سؤال .. بسألك .. إيه آخرة الترحال ؟؟

أحمد : كل سنة وانت طيب
رامى : وانت طيب , بس ايه المناسبة ؟؟
أحمد : بكرة 15 اكتوبر , يوم انضمامك للنادى الثلاثينى
رامى : أرقام .. مجرد أرقام
أحمد : تفتكر احنا اتغيرنا ؟؟
رامى : يمكن
أحمد : وتفتكر إيه اللى غيرنا ؟؟؟ العمر اللى بيجرى ؟؟ ولا الظروف اللى حوالينا ؟؟
رامى : جايز العمر وجايز الظروف و جايز الإثنين
أحمد : هو إيه اللى "يمكن" و "جايز" ايه الردود الرمادى دى ؟
رامى : انا مش عاوز أجاوب ومش عاوز افكر
أحمد : انت عارف انت كنت بتفكرنى بزوربا , شخص ثائر وجواه كيان دائم التمرد , حبه للحياة بيخليه يشعر بإيقاعات هو بس اللى حاسسها وهو بس اللى يقدر يرقص عليها
رامى : هاهاهاهاها
أحمد ( مندهشا ) : بتضحك على إيه ؟؟
رامى ( مستمرا فى الضحك ) : هاها ...انت فاكر مشهد أنتونى كوين لما طلع على الجبل وهو ماسك فى ايده معوّل وعمال يصرخ فى الجبل

I’ll beat you

المغفل كان بيحارب الجبل , الإنسان لوحده مهما كان يقينه بيبقى أضعف من إنه يواجه حاجات زى العمر و الأقدار ... والجبل, تقدر

تقولى جبل زائد إنسان يساوى كام ؟؟ افهم يا أحمد الجبل جبل والإنسان إنسان , مش كل الحاجات يا احمد .. بينفع تتجمع

كتبها ايــــــــــــــــــوب :: ٢:٥٦ ص :: 18 نيران صديقة :

ها ياسيدى .. قول رأيك

------------------o0o------------------